Қазақстанда өмірді сақтандыру онлайн форматқа қалай көшуде

Қазақстанда сақтандыру нарығын цифрландыру бойынша сақтандырудың өмірді сақтандыру саласына да әсер ететін ауқымды бағдарлама әзірленуде. Қаржы нарығын реттеу және дамыту агенттігі Ұлттық банкпен бірлесіп әзірлеген 2030 жылға дейінгі сақтандыру нарығын дамыту бағдарламасының жобасына сәйкес, негізгі бағыттардың бірі бірыңғай цифрлық клиенттік жолға көшу болады. Электрондық шарт сақтандырудың жаппай түрлері үшін негізгі форматқа айналуы тиіс, ал тұтынушылардың көпшілік мәселесін сақтандыру компаниясының кеңсесіне бармай-ақ онлайн режимде шешуге мүмкіндігі болады. Бұл жерде өмірді сақтандыру компанияларының (ӨСК) қазірдің өзінде не жасағанын және жасанды интеллект (ЖИ) құралдарын енгізу арқылы қаншалықты алға жылжуға дайын екенін айтып береміз.

Өмірді сақтандырудың электрондық полисінің түпнұсқалығын тексеру мүмкіндігі қолданыстағы заңнамада көзделген және барлық сақтандыру шарттары тіркелетін Бірыңғай сақтандыру деректер базасында (БСДБ) іске асырылған. Электрондық полис рәсімделген кезде оған бірегей нөмір беріледі. Еліміздегі барлық өмірді сақтандыру компанияларының клиенті полис нөмірі мен ЖСН/БСН енгізу арқылы ГКБ ресми сайтында полистің түпнұсқалығы мен мәртебесін өз бетінше тексере алады. Шарт жасалғаннан кейін клиентке полис туралы ақпарат және оны тексеруге өту мүмкіндігі көрсетілген SMS-хабарлама және/немесе электрондық хат та келеді.

ӨСК Nomad Life компаниясы компания ұсынатын сақтандыру шарттарының басым бөлігінің құнын толық онлайн режимде (кеңсеге бармай-ақ) есептеу және рәсімдеу мүмкіндігін іске асырды. «Цифрлық сервистерді кеңейту жоспарланып, біртіндеп енгізілуде. Қазір клиент компанияның сайтындағы жеке кабинеті арқылы сақтандыру жағдайы туралы қашықтан хабарлай алады. Сақтандыру жағдайының орын алғанын растайтын құжаттарды, сондай-ақ ерікті өмірді сақтандыру шарттары бойынша көбіне сақтанушы болып табылмайтын пайда алушының төлем алуға құқығын ұсыну әзірге цифрлық құжаттар түрінде іске асырылған жоқ, өйткені бірқатар мемлекеттік органдар мен ұйымдардың цифрлық сервистерімен интеграциялау процесі және олардағы деректердің толықтығы әлі де пысықталу немесе талқылау сатысында», – деп нақтылайды ӨСК Nomad Life баспасөз қызметі.

ӨСК «Евразия» операциялық қызметінде жасанды интеллект (ЖИ) технологияларын пайдаланады және бұл бағытты одан әрі дамытуды жалғастыруда. Атап айтқанда, ЖИ клиенттік құжаттарды өңдеу – оларды тану және бастапқы автоматты өңдеу үшін қолданылады. Бұл клиенттердің өтініштерімен жұмысты жеделдетуге, операциялық қателердің санын азайтуға және күнделікті процестердегі адам факторын төмендетуге мүмкіндік береді.

«Тағы бір перспективалы бағыт – клиенттерге тәулік бойы шарттардың талаптары мен сақтандыру төлемдерінің мәртебесі туралы ақпарат алуға көмектесетін интеллектуалды виртуалды ассистенттер. Біз үшін ЖИ енгізудің өзі мақсат болмауы маңызды. Біз бұл технологияларды ең алдымен клиенттерге қызмет көрсетуді жылдам, ыңғайлы және тиімді етуге мүмкіндік беретін құрал ретінде қарастырамыз», – деп атап өтті ӨСК «Евразия» баспасөз қызметі.

ӨСК Freedom Life компаниясында қызметкерлерге арналған Aru AI-агенті жұмыс істейді – бұл ішкі білімдерге қолжетімділікті қамтамасыз ететін және жұмыс міндеттерін шешуге көмектесетін цифрлық көмекші: ішкі нормативтік құжаттардан (ІНҚ) және нұсқаулықтардан ақпарат табу, процестерді түсіну, типтік қателер мен техникалық мәселелерді шешу, деректерді выгрузка жасау және өтініштерді тиісті бөлімшелерге бағыттау. Бұл сұрауларды өңдеу уақытын қысқартуға, бейінді бөлімшелерге түсетін жүктемені азайтуға және ішкі процестерді стандарттауға мүмкіндік береді.

«Сонымен қатар клиенттерге арналған Aya AI-агентін әзірлеу жұмыстары жүргізілуде. Ол сақтандыру саласындағы цифрлық көмекшіге айналады: клиенттің қажеттілігін түсініп, қолайлы сақтандыру шешімін ұсына алады, шарттарды түсіндіреді және бір диалог аясында полисті рәсімдегенге дейін клиентке қолдау көрсетеді. Бірінші кезеңде Aya туристік сақтандыру сценарийінде іске қосылады, кейін компанияның басқа өнімдеріне де масштабтау жоспарлануда. Осылайша, ЖИ қолдануды ішкі операциялық процестерде де, клиенттік сервистерде де кезең-кезеңімен дамытып келеміз», – деп атап өтті ӨСК Freedom Life басқарма төрағасы Азамат Ердесов.

Қазіргі уақытта ӨСК BCC Life компаниясы жасанды интеллект (ЖИ) жүйелерін пилоттық режимде сынақтан өткізуде және оларды одан әрі цифрлық трансформациялау үшін қажетті құралдар ретінде қарастырады. Мұнда ЖИ-ді клиенттік тәжірибені дербестендіру үшін пайдаланудың әлеуеті жоғары деп есептейді. Мысалы, клиент сақтандыру шарттары туралы түсініктірек түсіндірмелер алып, өзінің өмірлік жағдайына сәйкес келетін шешімді жылдамырақ таңдай алатындай ету.

«Жақсы жүйе – бұл мәселені сапалы әрі уақтылы шеше алатын жүйе. Сондықтан ЖИ енгізу кезінде біз ең алдымен технологияның өзіне емес, оның клиенттің немесе қызметкердің нақты қандай мәселесін шешуге көмектесетініне назар аударамыз. Болашақта ЖИ жүйелерінің цифрлық сақтандыру өнімдерін дамытуда әлеуеті зор деп санаймыз. Технологиялылық, қауіпсіздік, деректерді қорғау және клиентке жауапкершілікпен қарау арасындағы теңгерімді сақтау маңызды», – деп қосты ӨСК BCC Life ақпараттық технологиялар бойынша басқарма мүшесі Бахтияр Тугельбасов.

дереккөз: https://prodengi.kz/post/kak-straxovanie-zizni-v-kazaxstane-uxodit-v-onlain