Отандық өмірді сақтандыру компаниялары мобильді қосымшалар мен банк экожүйелеріне назар аударуда

Сарапшылардың бағалауынша, мобильді сақтандыру қосымшаларының жаһандық нарығы 2024 жылы шамамен 9,8 млрд долларды құраса, 2033 жылға қарай 21,6 млрд долларға жетуі мүмкін. Бұл ретте орташа жылдық өсім шамамен 11,4%-ды көрсетеді. Сонымен қатар, өмірді сақтандыру wellness-бағдарламаларымен жиі ықпалдастырылуда: қосымшалар дене белсенділігін бақылап, сақтандыру сыйлықақыларына жеңілдіктер немесе жекелендірілген ұсыныстар береді. Мысалы, Swiss Re компаниясы Wysa-мен серіктестікте үш құрлықтағы сақтанушыларға психикалық денсаулық бойынша AI-қолдау көрсетеді, ал үнділік Inka стартапы смарт-сағаттар деректері арқылы «сақтандыру wellness-балын» есептейді. Қазақстандағы жағдай туралы осы мақалада баяндаймыз.

Қазақстанда банктер мен өмірді сақтандыру компаниялары стратегиялық серіктестіктер аясында белсенді түрде бірігіп, так называемые bancassurance модельдерін қалыптастыруда. Мұндай интеграциялар банктерге клиенттеріне сақтандыру өнімдерін ұсынуға, ал сақтандырушыларға банктердің миллиондаған клиенттік базасына қол жеткізуге мүмкіндік береді.

«Иә, біз серіктестік интеграцияларды цифрлық стратегиямыздың негізгі бағыттарының бірі ретінде қарастырамыз. Қазірдің өзінде өнімдеріміз бен сервистерімізді Банк ЦентрКредит экожүйесіне енгізіп жатырмыз. Бұл бізге бір орта аясында бірыңғай әрі үйлесімді цифрлық өнімдер құруға мүмкіндік береді», – дейді ВСС Life ӨСК IT жөніндегі басқарма мүшесі Бахтияр Түгелбасов.

Өз экожүйесінің болуы және банк тобына тиесілілік клиентпен өзара әрекеттесуді айтарлықтай жеңілдетеді. Қазіргі таңда сақтандырушы бірыңғай цифрлық контурда жұмыс істейді, мұнда процестер синхрондалып, клиент жолы барынша ыңғайлы әрі жүйелі құрылған.

«Мұндай интеграцияның бірқатар артықшылықтары бар. Біріншіден, клиентке әртүрлі платформалар арасында ауысудың қажеті жоқ — өнімдерді рәсімдеу банк қосымшасындағы бірыңғай пайдаланушылық тәжірибенің бір бөлігіне айналады. Екіншіден, процестер барынша жеңілдетіледі: клиенттің қолда бар деректері пайдаланылады, қадамдар мен қажетті құжаттар саны азаяды. Үшіншіден, жүйелердің терең интеграциясы арқасында рәсімдеу және шешім қабылдау жылдамдығы артады», – дейді спикер.

Мұндай серіктестік клиенттер үшін сақтандыру өнімдеріне қолжетімділікті ыңғайлы, жылдам әрі үздіксіз етіп, бірыңғай цифрлық экожүйе арқылы пайдаланушылық тәжірибе сапасын арттыруға мүмкіндік береді.

«Компаниямыздың жоспарында ірі қазақстандық банктер мен қаржылық суперқосымшалардың экожүйелерімен интеграция бар. Әзірлемелер сақтандыру жарналарын төлеу процесін жеңілдетуден бастап, кобрендтік өнімдер әзірлеуге және big data талдауы нәтижесінде әлеуетті клиенттерге жеке ұсыныстар қалыптастыруға дейінгі кең ауқымды қамтиды. Бұл бастамалар клиенттердің қажеттіліктерін толық қанағаттандыруға және олардың уақытын үнемдеуге бағытталған», – деп нақтылайды «Евразия» ӨСК басқарушы директоры Игорь Енгалычев.

Оның айтуынша, клиенттер өз уақытын бағалайды және компанияға бармай-ақ негізгі мәселелерді шешуді жөн көреді.

«Қазіргі таңда жеке кабинеттегі ең сұранысқа ие функциялар – сақтандыру полисінің PDF-нұсқасын алу және кезекті сақтандыру жарналарын бірнеше батырмамен жылдам әрі ыңғайлы төлеу мүмкіндігі», – деп атап өтті Игорь Енгалычев.

ВСС Life ӨСК IT жөніндегі басқарма мүшесінің айтуынша, клиенттер мобильді қосымшалар мен жеке кабинеттерді, әсіресе базалық операциялар мен өнімдер туралы ақпарат алу үшін белсенді пайдаланады. Дегенмен, сақтандыру қызметтерін тұтыну мәдениеті әлі де даму үстінде және классикалық банктік сервистермен салыстырғанда төмендеу деңгейде қалып отыр.

«Ең сұранысқа ие функциялар – қолданыстағы шарттарды рәсімдеу және сүйемелдеу, өнімдер туралы ақпарат алу, құжаттарға қол жеткізу, сондай-ақ полистерді басқаруға байланысты сервистік операциялар. Бұдан бөлек, өнімдерді онлайн рәсімдеуге қызығушылық артып келеді, бұл клиент жолын цифрландырудың жалпы үрдісін растайды», – дейді Бахтияр Түгелбасов.

Ол міндетті сақтандыру түрлері пайдаланушылардың жоғары белсенділігін көрсететінін және цифрлық форматтағы сақтандыру сервистерімен өзара әрекеттесу дағдысын қалыптастырып жатқанын атап өтті. Бұл жалпы трендті айқындап, сақтандырудың өзге өнімдеріне деген қызығушылықтың біртіндеп артуына ықпал етуде.